Gbedu don carry tori enter girl’s hostel as e dey hot for their area every weekend. We don chuk eye find out say majority of hostel girls dey leave hostel wey dem pay for, waka go place wey only dem sabi. This matter wey dey questionable over the years now as the FUTO female hostels dey always dey like wia people run from boko haram invasion during the weekends. Our question come be; why dis shenkes dey comot every weekend? Where dem dey even go dis sabbatical leave?
Our kookoorookoo eye reporter wey vex chuk
eye for the matter, come reveal to us say wetin em hear as em go interview these
girls clear em doubt well well, as one ogbonge shenkes wey em catch for hostel
C yarn am say most of these waka wey these girls dey make na piom! Piom! Piom!
Waka. Em open our eye say the population of girls wey we dey see for Umuchima,
Eziobodo and Ihiagwa for weekends na Hostel girls wey go sabbatical leave for
their boyfriend house. Joyce come yarn her
own view say any Friday you see a hostel girl with a big hand bag know
say no be only “mbumchi” she go, but
na the whole weekend. She say “if God open your eye see wetin dey dat bag you
go fear girls” as most of dem fit squeeze in 3 pants,2 bra, 3 leggings, two
tops etc. Em say most of this girls no mind wear their bobo polo wen dey reach
their destination if dey see say the cloth dem, carry dey small, as some dey
even leave their pant, and bra for the guy house make em fit dey remember say
dem go come weekend. We come waka like
kingkong enter hostel D come ask group
of girls wey dey fetch water wetin their own view be towards this ogbonge
matter. They come insist say na poor management of the hostel, as well as Nepa
wey no dey plus water wey dey hard to see say em dey contribute well well to
the sabbatical leave,
We come dey plead with our oga dem at the top
wey be importers make dem be careful and
take am easy oo, as e dey worst wen shenkes use em hand export herself
come your domot ooo. We still dey beg
our shenkes wey dey involved in this waka say make dem dey sure say na pure
waka be dis oo before dey go dey “bellefull” which is automatic 9 months I.T.
Sama Samba
Gbedu reporter
COMMENTS